海賊王: 小鮮肉陪High tea 阮小儀勁風騷喪笑 (娛樂) 2018/04/07 頭條日報 Headline Daily - 頭條網　　47歲嘅黃金盛女阮小儀（小儀），有指佢09年與出版社高層男友黃志暉分手後就Dry足8年。日前下午，見小儀約咗班仔仔去中環ifc歎茶，茶腳有關楚耀和笑起嚟有啲似谷德昭嘅DJ拍檔朱穗傑(傑傑)等。有幾位小鮮肉陪食，小儀姐姐心花怒放，離開時個樣勁冧滋滋，風騷到頭髮都識飛呀！採訪 : 李維隆　　身高唔夠5呎、現年47歲嘅有米小儀，曾被拍檔森美取笑是「童顏巨躉」，16年8月網上瘋傳佢同余文樂公開戀情，仲有幅兩人攬攬照，一睇就知假啦！　　日前下午3時，小儀上午做完節目後約咗班仔仔去ifc開心歎茶。席間除咗有佢位DJ同事傑傑外，仲有歌手關楚耀(Kelvin)。Kelvin早前話自與韓籍模特兒女友分開後，兩年無再拍拖，近年愛上攝影嘅佢，當日孭住部相機，不時影兩張，鬼咁自high。一行6人五男一女，小儀置身喺班小鮮肉中不知幾enjoy，成日姣笑。Gathering逾一小時，眾人分批離開，請客嘅富婆小儀和傑傑雙雙步出去取泊車優惠。發現記者時，小儀主動笑晒口揮手打招呼，邊行邊風騷大笑，心情超正，幾百蚊餐茶抵請啦！