大熱男配角踎排檔醫肚 姜皓文O氹老婆有計 (娛樂) 2018/03/27 頭條日報 Headline Daily - 頭條網 因為一連串嘅影視展，曬冷式嘅港產片介紹非常令人期待，特別係姜皓文(黑仔)演變性人的電影《翠絲》，其Poster在網上平台被瘋狂洗版，最重要本屆香港電影金像獎，佢憑兩套戲入圍最佳男配角成頂頭大熱。51歲行中年運嘅黑仔捱過衰過明白成功得來不易，有名有利仍然慳家，同老婆踎街邊排檔食牛雜麵當Lunch，食完拖實老婆行去停車場攞車，黑仔嫂金慧英全程笑唔停，隔住張相都Feel到佢好開心，黑仔O氹妻原來有一手。 黑仔入行32年，近年成為港產片御用男配角，套套戲都好似有佢份做，去年終於等到做男一，話題性十足嘅《翠絲》Poster中，陽剛味濃嘅黑仔穿紫色喱士背心配吊帶襪，單手輕撥恤衫衣領，媚態加自憐感覺令人眼前一亮。加上同由其任男一的《電影痴漢》跟古天樂合作的《明日戰記》，及首拍TVB劇《鐵探》，估計黑仔將會好紅。 黑仔嫂好開心 未來紅星加準男配角都要食飯，但搵到錢嘅黑仔唔係吓吓食好嘢，街邊檔經濟又快靚正。日前下午，黑仔去咗中環嘅吉士笠街食有名嘅鐵皮檔水記，佢邊食牛雜麵邊撳智能電話，一心二用無難度，食到咁上下，黑仔嫂蒲頭，兩人食完就拖住手行去ifc。黑仔嫂去洗手間，黑仔就去接待處印停車場飛仔，全程最好睇係黑仔嫂個正能量笑容，無間斷放送，望多兩眼都受感染，個人開心晒。 採訪：張詠森

via 頭條日報 Headline Daily - 頭條網 https://ift.tt/2G8KgIV