做音樂搵唔到食 林一峰出書爆音樂人辛酸 (娛樂) 2018/05/03 頭條日報 Headline Daily - 頭條網 百足咁多爪的音樂人林一峰最近推出新書《歌裏人》，新書講音樂行業，從歌手微量的收入到香港樂壇面對的問題，一峰慶幸多年來收入好穩定。為在逆境中求存，一峰更加勤力，乜都肯做，個人貼士係：「音樂同商業要放埋一齊，只不過有先後次序，創作時千祈唔好諗商業，創作後盡量搵商業元素出嚟，咁就有持續發展空間喇。」 採訪：方騫平 林一峰由03年開始到現在共推出了8本著作，他幽自己一默說：「雖然我俾人話凍齡啫，但其實都相差咗15年，開始有頸紋嘞，不過冇變過嘅就係仍然鍾意寫字，鍾意做音樂同埋做創作。o依家全世界面對傳統媒體架構變遷，看似好亂反而有更多機會，新書中我不停去尋求答案，思考過程好有趣，亦希望藉住呢本書向傳媒朋友同埋音樂人打氣。」 他坦言現時做音樂相當困難，競爭不止本地市場，對象來自世界各地唔同媒體及所有娛樂，而且歌手收入唔多，作為創作人、歌手要去調整。 唔望發達 他自爆說：「好似我首歌《一支煙的時間》，5年間係串流平台俾人聽咗100萬次，但只收得番幾千蚊港幣！呢個就係行業未成功轉型嘅現象，咁我又唔覺得悽慘嘅，最重要大家知道仲有得做，山大斬埋有柴，大家唔好只係諗住錢嚟做事，其實仲有好多出路。好彩過去15年除出唱片、做show同埋創作外，自己策劃好多嘢，好似成立咗3年嘅《音樂峰眾籌網站》專營『集資做音樂』事業，我連食譜都出過，唔望發達，生活ok，足夠養家同去旅行就得。」

via 頭條日報 Headline Daily - 頭條網 https://ift.tt/2JNwLfg