踢走泰籍正印 富男友陪Tea 廖碧兒勝利笑容風騷出巡 (娛樂) 2018/05/01 頭條日報 Headline Daily - 頭條網 39歲嘅中女廖碧兒（Bernice）自3月被揭搭上失婚隱形富豪Calvin（盧啟賢）後，戀情愈揭愈好睇，一度傳出男方與拍拖7年嘅泰籍女友Nina未分手，最新有指疑做「小三」嘅Bernice爭贏正印Nina，得寵碧兒同男友雙雙高調去酒店High tea，公然晒愛。獲富男友賜女友「名份」嘅Bernice歎茶當日打男友大髀宣示主權，日前下午，唔使開工嘅碧兒喺女助手陪同下勁風騷去銅鑼灣利園名店Shopping。成身名牌嘅佢展現勝利笑容喺名店豪花約十萬元買衫，預演闊太生活，真係幾happyO架！ 近年廖碧兒被指暗交富商，生活指數升呢，除進駐大埔千萬豪宅倚龍山莊，更試過手拎VIP才可訂購嘅80萬Hermès Birkin。其新歡亦好架勢，41歲失婚兼有一女嘅Calvin，早前現身法國酒莊豪擲兩億歐羅（約19.3億港元）掃香檳，有指佢家族生意相當龐大，喺香港及內地、新加坡、印尼、英國及加拿大均有物業。仲有傳Calvin日前登上美國某媒體2018年金融市場十大最有影響力人物榜，其後在港開派對，開咗50支、每支約6,000蚊嘅香檳「萬歲」。 金龜寵愛 碧兒認愛Calvin短短一個月，新聞不斷，但佢處處維護男友，力撐愛郎專一。碧兒咁識做，Calvin馬上「做嘢」，帶佢到酒店歎茶，打情罵俏晒戀情。有金龜寵愛，日前下午，蜜運Bernice化淡妝、一身casual look勁風騷現身銅鑼灣。咪睇佢着件牛仔衫加黑衫黑褲好低調，其實成身堆滿名牌，手拎一個有升值能力、十萬元起跳嘅黑色Hermès Birkin、Gucci皮帶、以及9千蚊嘅新款Gucci波鞋，再加埋名錶和accessories，齋係行頭都起碼二、三十萬。佢喺女助手陪同下去咗利園2期嘅意大利品牌MARINA RINALDI掃貨。見佢春風滿面同店員有講有笑，又不斷試衫。逗留近一小時，Bernice瘋狂掃咗成十萬衫，再露出勝利笑容走人。 採訪︰李權威

via 頭條日報 Headline Daily - 頭條網 https://ift.tt/2jjmrAw