患癌割脷保命 怕遺傳老人癡呆 洪朝豐食蝦險鯁死 (娛樂) 2018/04/07 頭條日報 Headline Daily - 頭條網 58歲前DJ洪朝豐去年罹患舌癌兼淋巴癌，要接受割脷大手術保命，除切走左邊2份1條脷，仲要剝埋左邊幾隻大牙，削去有癌細胞的牙床骨，用復修的舌頭冚住虛位作「保護」，不論味覺及捲動都只能靠右邊舌頭帶動。劫後重生的洪朝豐及時保住命仔，但容貌、聲線及發音不復再！就連生存最基本的進食都係一個難題，他帶點無奈地幽自己一默：「我試過好興奮咁食蝦，點知隻蝦用門牙咀嚼得唔夠碎卡住我喉嚨險死，堅驚，哈！自此我就唔敢咁得戚食固體食物！」縱使洪朝豐樂觀地面對逆境，卻笑中有淚。 採訪：方騫平 場地：新蒲崗貝爾特酒店 洪朝豐冇咗左邊牙牀及大牙，進食及發音都係難題，重組的舌頭又較原來的脹大，條脷經常伸延到牙齒外圍，所以成日咬親，仲會含住食物咁發出嗒嗒聲；不過，他充滿期盼說：「醫生話手術係成功嘅，冇需要修正，總之醫生話以後咀嚼到食物，但唔係睇一頭半個月，可能係幾個月甚至幾年嘅事，聽住醫生講先。之前腫瘤科醫生話，術後味蕾會錯亂，甚至冇晒味道，曾經覺得只能食流質嘢仲要無味道，生活質素好低好難接受，o依家又覺可以。電療期間味蕾喪失甜同酸味，但呢幾日感覺到好小好小甜味返番嚟。（係咪意味住人生苦中帶點甜？）唔只一點甜，係好甜，好多人對我好好，我覺得自己好幸運，前妻會同我研究唔同食譜，有好多人會送我補健品。」 食固體食物非常麻煩 他又自爆術後幾乎鯁死經歷：「憑良心講o依家唔係好想食固體嘢，因為好麻煩，我先要用門牙咬碎食物，再放去有味覺嗰邊舌頭感覺吓食物味道，然後擘大個口，用筷子將食物推入去咽喉位置生吞，過程中會咬親條脷，痛到面容扭曲成身震哂。亦試過食蝦鯁親，因為冇粥水送蝦，搞到卡住喺喉嚨，開始呼吸困難，加上當時有幾宗鯁死新聞，自己都好驚會窒息死，即刻攞杯茶大啖飲落去，鼻涕眼淚走晒出嚟，碌一聲蝦就吞咗，但之後喉嚨就好痛。」 平淡舒服走剩餘日子 10多年前洪朝豐患上抑鬱狂躁症，和已故寶詠琴一段戀情令他陷入「豐狂歲月」，人生都算係好傳奇。他帶笑說：「發生咁多事，可能係上天專登揀選我，令我堅強啲，從苦難中成為別人嘅祝福，令黑暗生活嘅人得到安慰呢！但我就唔想，因為我能力有限，承受唔到咁多苦難，我唔想好似甘地、德蘭修女咁將生命來奉獻，服務大眾咁悲壯，對我嚟講太偉大，其實我想做平凡人，平平淡淡舒舒服服咁走完我剩返落嚟嘅日子。我有抑鬱狂躁症，又有舌癌、有埋淋巴癌，唔好畀埋媽媽生前有嘅老人痴呆症我呀，唔該！」他還用蘇軾詞《定風波》形容自己悠然自得心境，「回首向來蕭瑟處，歸去，也無風雨也無晴。」

via 頭條日報 Headline Daily - 頭條網 https://ift.tt/2qbyKCB